Дзень інфармавання насельніцтва адбудзецца ў Дзісне 2 мая. 4 інфармацыйна-прапагандысцкія групы райвыканкама выступяць практычна ва ўсіх калектывах прадпрыемстваў, арганізацый і ўстаноў горада.

З 19 красавіка па 14 мая ў раёне праводзяцца мерапрыемствы, скіраваныя на прафілактыку ДТЗ з удзелам вадзіцеляў матацыклаў, мапедаў і іншых механічных двухколавых транспартных сродкаў.

У мінулым годзе ў вобласці здарылася 49 такіх ДТЗ. 7 чалавек загінула, 46 атрымалі раненні рознай ступені цяжкасці. На момант аварыі 16 вадзіцеляў знаходзіліся ў стане алкагольнага ап'янення. Пагаршае сітуацыю і тое, што многія з іх, а таксама і пасажыры, не надзяваюць моташлем. Між тым гэтая норма ўведзена з пачатку 2009 года указам Прэзідэнта РБ.

— Пасеяць зерневыя ў сціслыя тэрміны — такая задача пастаўлена перад аграрыямі, і паспяховасць яе выканання будзе залежыць ад зладжанай работы хлебаробаў і іх памочнікаў-шэфаў у правядзенні палявых работ. Аб накіраванні на перыяд сяўбы ў вёску тэхнікі і механізатараў з гарадскіх прадпрыемстваў прынята рашэнне райвыканкама і выкананне яго — абавязковае, — з гэтага пачаў старшыня райвыканкама І. В. Кузняцоў семінар-нараду з кіраўнікамі сельгасарганізацый і прадпрыемстваў раёна. Складаныя ўмовы надвор'я патрабуюць мабілізацыі ўсіх сіл і тэхнічных сродкаў для імклівага правядзення сяўбы.