7 ліпеня “прамую лінію” праводзіў старшыня райвыканкама І. В. Кузняцоў. Да кіраўніка раёна звярнулася 15 чалавек з розных куткоў Міёршчыны. Абсалютная большасць званкоў тычылася рамонту дарог і вуліц. Гэтую праблему ўзнімалі жыхары Язна, Пад’едльцаў, Вінагродаў, Новага Пагоста, Завуцця, іншых населеных пунктаў і райцэнтра. Так, у Новым Пагосце адну з вуліц разбіў транспарт лясгаса. Жыхароў Вінагродаў непакоіць пад’езд, насельнікі вул. Янкі Купалы з райцэнтра жадалі б асфальтавання. Гэты пералік можна працягваць. Усе пажаданні ўзяты на кантроль, па самых тэрміновых пазіцыях дадзены канкрэтныя ўказанні, якія тычацца грэйдзіравання, невялікіх аб’ёмаў рамонту і падсыпкі. Аднак трэба ўлічваць, што дарожныя работы патрабуюць вялікіх капітальных укладанняў і часу. Хутка яны не робяцца.
Сярод іншых праблем—водазабеспячэнне жыхароў вёскі Пруднікі, што ў Павяцкім сельсавеце. Там праржавела воданапорная вежа. Кіраўніцтва УП “Міёрскі” абяцала выканаць зварачныя работы ў бліжэйшы час.
У СВК “Чэрасы” ўтварылася пэўная запазычанасць за закупленых цялят. Для выпраўлення сітуацыі таксама будуць прыняты неабходныя меры.
Ад жыхароў райцэнтра паступіла просьба адкрыць у горадзе дзіцячае кафэ, якое можна было б наведваць сем’ямі. Магчымасць гэтага будзе вывучацца.
Падрыхтаваў Леанід МАТЭЛЕНАК.