За студзень-сакавік 2011 года ў раёне на жыллёвае будаўніцтва выкарыстана 3768 млн. рублёў інвестыцый, а гэта ў супаставімых цэнах на 36,7% менш, чым за аналагічны перыяд летась.
Арганізацыямі ўсіх форм уласнасці (уключаючы індывідуальных забудоўшчыкаў) узведзена 13 кватэр агульнай плошчай 1339 кв. м (11,2% гадавога задання). У параўнанні з мінулым годам увод жылля паменшыўся на 1046 кв. м, або на 43,9%.
Асноўнымі крыніцамі фінансавання жыллёвага будаўніцтва з’яўляюцца крэдыты банкаў і ўласныя сродкі насельніцтва. За першы квартал за кошт крэдытаў пабудаваны 891 кв. м агульнай плошчы жылля (66,5% агульнага ўводу), за ўласныя сродкі — 448 (33,5%).
У сельскіх населеных пунктах уведзена ў эксплуатацыю 1202 кв. м (74,8% да ўзроўню мінулага года).
Для грамадзян, што стаяць на ўліку маючых патрэбу ў паляпшэнні жыллёвых умоў, уведзены 2 жылыя дамы (кватэры) агульнай плошчай 172 кв. м. Удзельная вага жылля, пабудаванага для дадзенай катэгорыі насельніцтва, склала 12,8%.