Цэнтрвыбаркам Беларусі выступае за максімальна свабоднае правядзенне пікетаў па збору подпісаў для вылучэння кандыдатаў у прэзідэнты. Аб гэтым заявіла Лідзія Ярмошына.

Адзіны спосаб вылучэння кандыдатаў на прэзідэнцкіх выбарах—гэта збор не менш як 100 тыс. подпісаў выбаршчыкаў. Для гэтага той, хто мае намер вылучыцца ў кандыдаты, падае ў ЦВК заяву на рэгістрацыю ініцыятыўнай групы ў складзе не менш як 100 чалавек. У 1994 годзе было зарэгістравана менш за 20 ініцыятыўных груп, у 2001-ым—больш. Менш за ўсё было ў 2006 годзе—толькі 9 груп. Аднак сабраць 100 тыс. подпісаў змаглі толькі 4 прэтэндэнты.

Пасля змянення выбарчага заканадаўства працэдура збору подпісаў стала больш ліберальная. З’явілася магчымасць праводзіць пікеты па збору подпісаў ва ўсіх месцах, якія не забаронены мясцовымі ўладамі.

Кожны кандыдат у прэзідэнты атрымае па гадзіне эфірнага часу на тэлебачанні і радыё (два выхады ў эфір па 30 мін.) на першым нацыянальным тэлеканале і столькі ж на радыё. Акрамя гэтага, у кандыдатаў павялічыцца эфірны час за кошт магчымасці весці тэле- і радыёдэбаты.