З мэтай забеспячэння поўнага і своечасовага паступлення плацяжоў у бюджэт дзяржаўнага пазабюджэтнага фонду сацыяльнай абароны насельніцтва, а таксама ўзмацнення плацёжнай дысцыпліны, 21 лютага прыняты Указ № 87 "Аб унясенні змяненняў і дапаўненняў ва ўказы Прэзідэнта Рэспублікі Беларусь па пытаннях дзяржаўнага сацыяльнага страхавання". Адпаведна яго прадастаўляецца права органам Мінпрацы і сацабароны насельніцтва ў выпадках нявыплаты (няпоўнай выплаты) ва ўстаноўленыя заканадаўствам тэрміны абавязковых страхавых узносаў, узносаў на прафесійнае пенсійнае страхаванне і іншых плацяжоў у бюджэт дзяржаўнага пазабюджэтнага фонду сацыяльнай абароны насельніцтва прыпыняць аперацыі плацельшчыкаў абавязковых страхавых узносаў па бягучых (разліковых) банкаўскіх рахунках, а таксама атрымліваць ад банкаў інфармацыю аб рэштках і руху сродкаў на гэтых рахунках.
Уведзена таксама забарона на адкрыццё банкам новых разліковых рахункаў плацельшчыку-даўжніку пры наяўнасцi рашэння органаў Фонду сацыяльнага страхавання насельніцтва аб прыпыненні аперацый па яго разліковых рахунках.
Ёсць змяненні і ў частцы выплаты абавязковых страхавых узносаў індывідуальнымі прадпрымальнікамі, натарыусамі і адвакатамі. Для названай катэгорыі плацельшчыкаў спрошчаны разлік сумы абавязковых страхавых узносаў, якія належаць выплаце. Для іх таксама ўстаноўлены мінімальны памер плацяжу ў бюджэт Фонду, вылічаны з мінімальнай заработнай платы з улікам яе індэксацыі.
Франя ПЯТКЕВІЧ,
начальнік раённага аддзела Фонду сацыяльнай абароны насельніцтва.