Адзіны запіс
У працоўнай кніжцы Тамары Аляксееўны Пашкоўскай адзіны запіс: прынята на работу страхавым агентам аддзялення “Белдзяржстраху” ў 1976 годзе. Вось як пра гэта ўспамінае субяседніца.
— У жніўні 2010-га споўнілася амаль 35 гадоў маёй работы на адным месцы. Абслугоўвала Туркоўскі, Узмёнскі сельсаветы, частку Дзісны.
Як людзі прыходзяць у страхавую службу? Па розных прычынах. Не апошнюю ролю адыгрывае выпадак. Вось і ў Тамары Аляксееўны пасля замужжа паўстала пытанне аб працаўладкаванні. Параілі паспрабаваць сябе ў ролі страхавога агента.
— А чаму б і не, — прадаўжае гутарку субяседніца. — Маладая, хадзіць пешшу — не прывыкаць. На ўчастку шмат хутароў. Дарогі дрэнныя. Лічу, што раней нагрузка на страхавога агента была большай. Цяпер з кожным годам менее насельніцтва, жыхары памяншаюць асабісты статак. Значыць, змяншаецца і дагаворная база. Мы падладжваліся пад уклад жыцця вяскоўцаў. Даводзілася рана ўставаць, каб заспець сваіх кліентаў па хатах да работы. Нямала даводзілася пісаць, бо спісы складаліся ўручную. У калгасе прыкладна чалавек 400. Нагрузкі не баяліся.
Расказала Тамара Аляксееўна пра брыгадны метад працы, які нейкі перыяд вельмі прапагандаваўся.
Трэба дадаць, што страхавыя агенты — тыя ж вясковыя людзі. Даводзіцца трымаць гаспадарку, даглядаць яе. А яшчэ дзеці. Тамара Аляксееўна з мужам выхавалі трох цудоўных сыноў.
З выхадам на пенсію, здаецца, жыццё паспакайнела.
— Цяпер зусім іншы распарадак, — з усмешкай адзначае Тамара Аляксееўна. — Не трэба спяшацца да сваіх кліентаў, засталася хатняя гаспадарка. Ёсць і кароўка, кабанчыкі, куры. Часам сумую. Тады бяруся за тэлефон і званю. Прывітанне Ані Урублеўскай, Валі Кубліцкай, Раі Бахір, Раі Казлоўскай. Шчыра віншую ўсіх працаўнікоў раённага аддзялення “Белдзяржстраху” з юбілеем — 90-годдзем. Новых вам здабыткаў. Мы, ветэраны, сочым за вашай працай і спадзяёмся, што заваюеце новыя вышыні.
Людвіг КАСАТЫ.