Каханне, усмешкі, кветкі, добры настрой, радасць… Як назваць усё вышэйпералічанае адным словам? Вядома, вясна. Нават злёгку прыцярушаныя, а то і шчодра засыпаныя снегам ці прыціснутыя марозам першыя вясеннія дні ўсё роўна абуджаюць душу да новых адчуванняў і жаданых змен. Невыпадкова ў гэтую чаканую і непрадказную пару года адзначаецца самы прыгожы і насычаны водарам кветак жаночы дзень.
З нагоды свята адбылося пасяджэнне клуба "Бажэна". Сустрэча праходзіла ў тэрытарыяльным цэнтры сацыяльнага абслугоўвання насельніцтва, а вялі яе супрацоўнікі ўстановы Валянціна Пундзіс і Ала Федарэц.
— Вясна і жанчына — непадзельныя, — адзначылі вядучыя і павіншавалі жанчын са святам.
Да іх далучыўся адзіны і самы любімы мужчына "Бажэны" Мікалай Міхайлавіч Федуковіч. Для сваіх сябровак ён падрыхтаваў цудоўныя вершаваныя пажаданні і кампліменты і, вядома, прыгожую песню пад баян. Жанчыны ў сваю чаргу адрасавалі яму віншаванні з мінулым днём абаронцаў Айчыны.
Дарэчы, цікавы той факт, што па старым стылі дзень 8 Сакавіка — гэта 23 лютага.
Сакавіцкае свята кахання і прыгажосці было галоўнай, але не адзінай падставай для сустрэчы ўдзельнікаў клуба. Па добрай традыцыі віншавалі імяніннікаў, якія ўжо адзначылі ці яшчэ збіраюцца святкаваць дні нараджэння (у дрэнныя прыкметы "Бажэна" не верыць). Прыгожыя вершаваныя пажаданні, вясёлыя песні ўласнага сачынення і памятныя падарункі падрыхтавалі для Валянціны Цярэнцьеўны Рус, Алены Іванаўны Хаткевіч і Ірыны Леанідаўны Гушча. Імянінніцы адказалі сюрпрызам, што захоўваўся ў таямнічай скрыні. Таму, хто здагадваўся, што гэта за прадмет, звязаны з захапленнямі жанчын, падарунак і даставаўся. Так, Валянціна Цярэнцьеўна адпра-віла ў скрыню свежую газету са сканвордамі, Алена Іванаўна — часопіс з кулінарнымі рэцэптамі, а Ірына Леанідаўна — зборнік сваіх любімых песень.
Для "бажэнаўцаў" была падрыхтавана цікавая праграма, насычаная забаўляльнымі конкурсамі і латарэямі, вясёлымі песнямі і дасціпнымі жартамі, аб'яднанымі радаснай і свежай тэмай вясны.
Кацярына РЫНКЕВІЧ.
Фота Казіміра БЛАЖЭВІЧА.
