26 мая шэсць інфармацыйна-прапагандысцкіх груп райвыканкама правялі 18 сустрэч у працоўных калектывах і па месцы жыхарства ў Перабродскім і Павяцкім сельсаветах. У адміністрацыйных будынках, майстэрнях, культустановах, дамах старэйшын ці проста вяскоўцаў, нават пад адкрытым небам адбыліся размовы пра ключавыя аспекты Паслання Прэзідэнта А.Р. Лукашэнкі беларускаму народу і Нацыянальнаму сходу, забеспячэнне грамадскай і пагранічнай бяспекі, заканчэнне вясенне-палявых работ, здаровы лад жыцця і Сусветны дзень без тытуню.

Але і гэты пералік не перадае поўнасцю тэматыку абмену думкамі, бо яна нярэдка залежыла ад канкрэтнай сітуацыі. Асабіста пабываў на сустрэчах з механізатарамі ААТ "Мерыца", жыхарамі вёсак Паташня і Чурылава Далёкае. Па непасрэдных назіраннях і заўвагах прадстаўнікоў іншых груп магу сцвярджаць, што настрой у жыхароў Міёршчыны спакойны, людзі ацэньваюць свае эканамічныя цяжкасці праз вялікія грамадскія і ваенныя ўзрушэнні ў навакольным свеце, перад мясцовым кіраўніцтвам ставяць звычайныя пытанні, якія рэальна ажыццявіць. Нярэдка яны тычацца стану дарог. Пры падвядзені вынікаў сустрэч у райвыканкаме было адзначана, што ўсё звязанае з грэйдзіраваннем, падсыпкай шчэбенем і гравіем, дарожная служба выканае ў самыя кароткія тэрміны. Так, дарогу на Яўцерашкі-Ніўнікі і далей да могілак давядуць да ладу ўжо 27 мая. Крыху больш часу спатрэбіцца на падсыпку аўтобуснай стаянкі ў Орцах, уладкаванне вуліц праз Орцы, Каменполле, некаторыя іншыя населеныя пункты. Месцамі магчымы так званы ямкавы рамонт, а вось на ўкладку асфальту ў бліжэйшы час сіл і сродкаў няма.

Заўваг на дзейнасць медыкаў, паштавікоў і іншых служб не было зусім. На тэрыторыі ВУПКУ "Міёрскі" адзначаліся перабоі з цыгарэтамі і цукрам. Кіраўнік райпа С.Д. Лясовіч заявіла аб прынятых мерах і прыняла да ведама патрабаванне старшыні райвыканкама, каб на перыяд нарыхтовак сельскае насельніцтва не адчувала недахопу менавіта ў цукры, воцаце, кансервавых накрыўках і іншым. Дадаткова гандлёвыя работнікі прапрацоўваюць цяпер пытанне арганізацыі прыёму шклотары ў аўтамагазінах. Што да чэкаў на тэр-міналах "магазінаў на колах", то іх выдаюць звычайна па просьбах пакупнікоў.
У Орцах прывесці ў парадак ці знесці старыя хлявы ля аграсядзібы абяцалі нашчадкі памерлых гаспадароў у чэрвені. Дадзена заданне кіраўніцтву РЭС хутчэй прыбраць у гэтай вёсцы галіны абрэзаных дрэў пад лініямі электраперадач.

Зацягнулася вырашэнне пытання з водазабеспячэннем некалькіх катэджаў у Забалоцці. Тут часта выходзіць са строю артэзіянская свідравіна. На яе рамонт, замену абсталявання і электраэнергію ВУПКУ "Міёрскі", як сцвярджае дырэктар гаспадаркі В.Д. Міхалкіў, за мінулы год выдаткавана не менш за 60 мільёнаў рублёў. Гэтая сума ў некалькі дзясяткаў разоў перабольшвае атрыманую плату за водакарыстанне. Таму прапануецца наступнае рашэнне: сельгаспрадпрыемства за свой кошт выкапае недастаючыя калодзежы, а гаспадары купяць гідрафоры.

На многія пытанні члены інфармацыйна-прапагандысцкіх груп адказы далі на месцах, усе істотныя заўвагі, што патрабуюць дадатковых сіл і сродкаў, узяты на кантроль.
Старшыня райвыканкама І.В. Кузняцоў запатрабаваў ад старшынь сельскіх Саветаў, кіраўнікоў працоўных калектываў усяляк падтрымліваць мясцовае насельніцтва і прыезджых гасцей, зразумела, вызваленне ад аплаты, велічыня аплаты за паслугі павінны залежыць ад прынятых нарматыўных актаў, калектыўных дагавароў, традыцый і іншых умоў.
Леанід МАТЭЛЕНАК.
На здымках — падчас сустрэч у ААТ "Мерыца". Фота аўтара.