Вясёлым танцам адкрылі прадстаўленне вучні харэаграфічнага аддзялення (кіраўнік —Вольга Фёдараўна Савейка).
Ніф-ніф, Наф-наф і Нуф-нуф з’явіліся на сцэне як вельмі таленавітыя героі: адзін — мастак, другі — фатограф, а трэці — паэт. Жылі бесклапотна і дружна. “Куляліся ў лужыне, вадзілі карагоды.” Аднак лета бясконцым не бывае, вось прыйшла пара шэрай і дажджлівай восені. Трэба было пра жыллё клапаціцца. Толькі Наф-наф сур’ёзна аднёсся да гэтай праблемы, а яго браты весяліліся да першага лядку. “Я буду разумнейшым — дом збудую з камянёў”, — спяваў песеньку ён. Ніф-ніф зладзіў хатку з саломы, а Нуф-нуф — з галля і тонкіх дубчыкаў. Калі прыйшоў час ратавацца ад галоднага ваўка, то з разбураных злодзеем хат яны ўсё ж пабеглі да Наф-нафа…
Казка асуджае ляноту, вучыць працавітасці, быць мудрым і кемлівым і не паддавацца розным глупствам, а таксама правільна размяркоўваць час — калі весяліцца, а калі важнымі справамі займацца.
У пастаноўцы гучалі лічылкі, народныя прыкметы, а акцёры, якія апавядалі пра змену падзей на сцэне, былі апрануты ў льняныя строі. Усё гэта выклікала ў глыбіні душы гордасць за наш адметны беларускі нацыянальны каларыт у пастаноўцы на новы лад англійскай казкі.

Пра юных артыстаў
“Тры парасяці” ўжо другая іх пастаноўка. У мінулым годзе яны паспяхова (і не раз) выступалі на сцэне з “Лёгкім хлебам”, таксама спектакль ставіўся паводле добра вядомай казкі.
Акцёры — вучні 3 класа тэатральнага аддзялення, што вучацца ў розных школах райцэнтра — гэта шасці-, сямі- і васьмікласнікі. Ролі галоўных герояў — парасят — выконвалі Аксана Бунта, Света Шчабол і Насця Даргель, ваўка —Уладзік Захарэнь, казачніц — Маша Кузіна, Каця Пачопка, Надзея Драба, Света Стральчук.
За музычнае афармленне адказваў Сяргей Рыгоравіч Аляксееў, і дапамагала эстрадная студыя “Зараніца”, якой ён кіруе; рэжысёры-пастаноўшчыкі — Ірына Паўлаўна Кубарка і Аксана Фёдараўна Аляксеева.
Адметна, што акцёры не толькі выдатна ігралі свае ролі, яны яшчэ шмат чаго зрабілі самі, для таго, каб пастаноўка атрымалася яркай, маляўнічай і вясёлай. Напрыклад, дэкарацыі малявалі пад кіраўніцтвам Таццяны Міхайлаўны Пацеенак, адказвалі за мастацкае афармленне сцэны, нават некаторыя элементы адзення шылі.
Кожны дзень юныя артысты наведваюць заняткі ў школе мастацтваў, іх аддзяленне асаблівае, бо спалучае шмат творчых накірункаў — яны спяваюць, малююць, танцуюць… На пытанне, ці падабаецца ім вучоба, голасна адказалі, што вельмі.
Вучаніцы СШ №3 Надзея Драба і Света Шчабол займаюцца яшчэ і вакалам. Удзельнічалі ў сваёй школе ў шоу-праграме “Хвіліна славы”. Таленавітым дзецям хочацца пажадаць новых поспехаў у акцёрскім майстэрстве.