17 верасня Міёры на паўвостраве гасцінна прымалі ўдзельнікаў абласнога свята нацыянальных культур “Нас з’яднала зямля Беларусі”. Пры ўваходзе размясцілася выстава восеньскіх дароў. Дзіцячая творчасць уражвала.
А далей выставы майстроў. Адна другой лепш. Талент мясцовых творцаў прыемна здзіўляў.
Нават у невялічкай Дзісне, дзе ўзначальвае Дом рамёстваў Алена Фадзееўна Балаш і кіруе работай гурткоў Таццяна Васільеўна Кузняцова, захапляцца вынікамі творчай дзейнасці можна бясконца.
Бліжэй да сцэнічнай пляцоўкі, дзе і павінны былі разгортвацца ўсе святочныя дзействы, размясціліся сталы, на якіх прываблівалі пахамі прысмакі нацыянальных кухань — руская, беларуская, украінская, армянская, татарская, яўрэйская, мардоўская, башкірская і іншыя.
Мясцовыя работнікі культуры прапаноўвалі гульнёвую праграму.
І вось загучалі пазыўныя свята. У “Беларускім танцы” закружыў узорны харэаграфічны калектыў “Лялькі” Верхнядзвінскага РДК.
Урачыста абвяшчаецца, што ў шосты раз праходзіць у Міёрах абласны фестываль. Сваю творчасць дэманструюць прадстаўнікі 14 нацыянальнасцей з розных гарадоў і раёнаў Віцебскай вобласці. Больш 250 удзельнікаў ствараюць рознакаляровую вясёлку шматнацыянальнай культуры нашага краю.
Удзельнікаў свята ўрачыста вітаюць начальнік аддзела ўстаноў культуры і мастацтва абласнога ўпраўлення культуры аблвыканкама Г. Ф. Баркевіч і старшыня Міёрскага райвыканкама І. В. Кузняцоў.
Адбор майстроў і выканаўцаў для ўдзелу ў рэспубліканскім фестывалі праводзіла журы: Я. М. Рэўтовіч — прафесар Беларускага дзяржаўнага ўніверсітэта культуры і мастацтваў; І. В. Лемцюгова — мастацкі кіраўнік ДУ “Рэспубліканскі цэнтр нацыянальных культур”; П. А. Гуд—загадчык кафедры рэжысуры абрадаў і свят БДУ культуры і мастацтваў, прафесар; А. В. Пякуцька — загадчык кафедры харавога і вакальнага мастацтва БДУ культуры і мастацтваў, прафесар; Я. М. Сахута — доктар мастацтвазнаўства, прафесар, старшыня ГА “Беларускі саюз майстроў народнай творчасці”; Э. Я. Швайко — галоўны спецыяліст упраўлення ўстаноў культуры і народнай творчасці Міністэрства культуры РБ. Прымаў удзел у рабоце і дырэктар ДУ “Рэспубліканскі цэнтр нацыянальных культур” М. Л. Рыбакоў.
Цікава праходзіў агляд выставы дэкаратыўна-прыкладнога мастацтва і нацыянальных кухань.
Так, народны клуб нацыянальных культур “Дружба” Іллюшынскага СДК Ушацкага раёна аб’ядноўвае ўкраінцаў, казахаў, узбекаў, татараў, башкіраў, марыйцаў. Прадстаўнікі казахскай культуры ўжо двойчы ўдзельнічалі ва Усебеларускім фестывалі (2002 і 2004 гады). Вялікая заслуга тут кіраўніка Вольгі Аляксееўны Візгалавай.
Гасціннасцю вызначылася і стараабрадавая кухня аматарскага аб’яднання “Гаспадынька азёрнай старонкі” Іказненскага СДК Браслаўскага раёна.
Татарскую нацыянальную кухню і дэкаратыўна-прыкладную творчасць прадстаўлялі госці з Оршы.
Удзельнікі народнага клуба аматараў беларускай нацыянальнай кухні “Разынка” Шумілінскага Дома рамёстваў пажадалі пазнаёміцца ў забаўляльнай гульневай форме.
Прыемна ўразіла калекцыя “Карагод лялек у нацыянальным строі” з Дуброўна.
Генадзь Фёдаравіч Ксенафонтаў працуе ў Аршанскім Доме рамёстваў. Яго творы — разьба па дрэве.
Жывапіс і графіку прадстаўляў Канстанцін Іванавіч Бандарэнка з Сенненскага Дома рамёстваў. Дарэчы, нарадзіўся ён на Украіне.
Было чым пахваліцца і клубу народных майстроў “Святліца” з Міёрскага РДК (кіраўнік — Алена Эдвардаўна Батарчук).
Мардоўскую нацыянальную кухню прапанавала Святлана Габдулаўна Сосік з Туркоўскага СДК нашага раёна.
Яўрэйская нацыянальная кухня Алены Шангіной з Міёр спадабалася не толькі смачнымі стравамі, але і трапным гумарам, жартамі, на якія не скупіўся яе калега Аляксей Гайдзель.
Вось прыгожыя чарнавокія дзяўчаткі-армянкі з Гомельскага СДК Полацкага раёна (клуб армянскай культуры “Хаш”) літаральна падкупілі шчырасцю, душэўнай цеплынёй і, безумоўна, гасціннасцю. Спадабаліся іх стравы, закранула за жывое песня, уразіў танец.
Выклікала цікавасць у прысутных экспазіцыя польскіх нацыянальных рэліквій, прадметаў хатняга ўжытку, літаратурных гістарычных дакументаў, што прадставіў настаўнік СШ №3 г. Міёры Вітольд Антонавіч Ермалёнак.
У канцэртнай праграме “У нас на ўсіх — адна планета, у нас на ўсіх — адна зямля” першым прымае ўдзел Віцебскі Цэнтр нацыянальных культур.
Уражвае кожны нумар, задаволеныя гледачы не шкадуюць апладысментаў. Народны ансамбля беларускай песні і музыкі “Полацкія россыпы” прадстаўляў Цэнтр рамёстваў і нацыянальных культур Полацка. Яго кіраўнік — Ядвіга Юльянаўна Аўласенка.
Узорны харэаграфічны калектыў “Лялькі” Верхнядзвінскага РДК пад кіраўніцтвам Людмілы Гуйда не раз выступаў за межамі рэспублікі. Цудоўны настрой падараваў ён удзельнікам свята і на гэты раз.
Апладысментамі горача падтрымлівалі азербайджанца Руслана Аблекімава з Полацка, у выкананні якога прагучала песня “Мая галубка”.
Юная Вікторыя Пятросава з Наваполацка з вялізным поспехам выканала народны армянскі эпас “Саят-Нова”.
Ва Ушачах жыве ўкраінка Вікторыя Гугіна. Песня “Адна калына” ў яе выкананні выклікала моцную глядацкую падтрымку і шчырыя апладысменты.
Дзіна Юдзіцкая — расіянка. Жыве і працуе ў Міёрах. Ганарымся прадстаўніцай нашага раёна, бо спявала прыгожа, эмацыянальна.
З ажыўленым смехам ўспрыняла публіка гумарыстычныя творы ў выкананні ўкраінкі Аляксандры Краўчанка з Сянно.
Зладжана спяваў народны гурт “Сябрына” Ахрэмаўскага Цэнтра нацыянальнай культуры Браслаўскага раёна.
Наогул, на свяце было і шмат іншых удзельнікаў канцэртнай праграмы. Выступалі ўсе ярка, уражваюча. У іх ліку і нашы міярчане — інструментальны квінтэт дзіцячай школы мастацтваў пад кіраўніцтвам Ігара Бунты, які выканаў папуры з польскіх мелодый.
Валянціна Пундзіс падаравала польскую песню “Танцуючыя эўрыдыкі” з рэпертуару Ганны Герман. Годна падтрымала яе і група падтанцоўкі.
У гэты дзень было шмат узнагарод, кветак і шчаслівых твараў.
Эвеліна БАГДАНОВІЧ.