Пытанне газіфікацыі аграгарадка "Чэрасы" абмяркоўваецца ўжо  некалькі месяцаў і вельмі радуе, што зроблены ў гэтым напрамку першыя, але важкія крокі: створаны кааператыў, атрымана згода генеральнага дырэктара УП "Віцебскаблгаз"  П. П. Шэршаня, наладжана цеснае супрацоўніцтва кааператыва са спецыялістамі райгазу. Спадзяёмся на паспяховае ажыццяўленне задумы па газіфікацыі цэнтральнага населенага пункта ААТ "Чэрасы", бо адчуваем пастаянную падтрымку кампетэнтных людзей.

3 красавіка адбыўся чарговы сход членаў кааператыва. Прыйшлі на яго і іншыя вяскоўцы аграгарадка, якія зацікавіліся магчымасцю падвядзення "блакітнага" паліва да жылых дамоў. Па просьбе сельскіх жыхароў на гэтую сустрэчу прыехалі, нягледзячы на занятасць, вядучы спецыяліст аддзела архітэктуры і будаўніцтва Міёрскага райвыканкама А. А. Колесава, дырэктар райгазу А. Э. Фяцковіч і галоўны інжынер К. А. Матэленак.  Яны вельмі кампетэнтна і галоўнае даступна растлумачылі  прысутным ўмовы крэдытавання, тэхнічныя і матэрыяльныя асаблівасці газіфікацыі населенага пункта. Дзякуй ім за падтрымку і супрацоўніцтва. Пры агульным старанні і падтрымцы многіх добрая справа зрушылася з месца, і чым больш будзе жадаючых ажыццявіць яе, тым лягчэй рэалізаваць намечанае.

Р. КРЭНЬ,

член спажывецкага

кааператыва.