Стан спраў на ўзвядзенні новага комплексу будынкаў цэнтральнай раённай бальніцы галоўны інжынер ІБКУП "УКБ Міёрскага раёна" Валерый Львовіч Какорыч вызначыў наступным чынам:
— Цяпер асноўныя работы вядуцца на галоўным корпусе. Прыкладна на 90% устаноўлены цагляныя перагародкі, засталося іх закончыць у падвальных памяшканнях. Знайшлі сваё месца ўсе аконныя блокі. Каля 70% знешніх сцен атрымалі цеплаізаляцыю. Яшчэ менш работ на даху. Ідзе мантаж вентыляцыі, пракладка электракабелю. З дня на дзень да справы прыступяць тынкоўшчыкі ўнутры памяшканняў. Цеплавыя сеткі пракладзены, іх неабходна злучыць у будынках. Каналізацыю трэба пракласці на ўчастку ў паўсотню метраў, потым пачнецца пракладка водаправодных труб.
Не надта вялікі сакрэт, што тэмпы работ стрымлівае фінансаванне. І ўсё ж справы ідуць. Вось прараб ЧПУП "Аол" з Полацка Уладзімір Аляксандравіч Пляско штодзень прывозіць на аб'ект 10-12 чалавек. Цяпер яны заканчваюць цагляную кладку перагародак у падвальных памяшканнях, займаюцца бетаніраваннем фундамента і апорных сцен. На гэта ўжо спатрэбіўся месяц, наперадзе таксама значныя аб'ёмы. На паверхах заняты электрыкі з Верхнядзвінска і вентыляцыйнікі з Полацка. Яны выканалі прыкладна палавіну неабходных аб'ёмаў, а трэба падрыхтаваць фронт для тынкоўшчыкаў, адразу за якімі прыступяць да справы аддзелачнікі.
Нават знешне будынак бальніцы мяняе выгляд, прыгажэе. Цяпер устанаўліваецца абсталяванне, якое дазволіць займацца ўцяпленнем і тынкоўкай галоўнага фасада.
На здымках: прыгажэюць сцены новай бальніцы; мантажом прыточнай і выцяжной вентыляцыі займаецца мантажнік з Полацка Дзмітрый Аляксандравіч Цярэшчанка.
Л. МАТЭЛЕНАК.