Справаздачна-выбарная канферэнцыя раённай арганізацыйнай структуры рэспубліканскага дзяржаўна-грамадскага аб'яднання "Беларускае таварыства паляўнічых і рыбаловаў" адбылася пасля заканчэння рабочага дня 21 лютага ў зале пасяджэнняў райвыканкама. У яе рабоце прынялі ўдзел першы намеснік старшыні райвыканкама В.А. Бялько, намеснік начальніка ўпраўлення палявання і рыбалоўства выканаўчага апарата РДГА "БТПР" В.Р. Круцько і старшыня Віцебскай абласной арганізацыйнай структуры П.Ц. Жылінскі.
Са справаздачай на канферэнцыі выступіў старшыня раённага савета таварыства Д.М. Шокель. У прыватнасці, ён адзначыў, што пры ўдзеле калектываў паляўнічых у раёне абсталявана 69 саланцоў, 3 прыпыначныя пункты і 6 стралковых ліній, пабудавана 7 пераносных вышак і 3 стацыянарныя для назірання і адстрэлу дзічыны, устаноўлены 4 кармушкі для казуль і 50 гняздаванняў для вадаплаўных птушак. Актыўна займаліся гэтай справай паляўнічыя Туркоўскага, Мікалаёўскага, Якубаўшчынскага, Дварнасельскага пярвічных калектываў. Найменшы ўклад у біятэхнічныя мерапрыемствы паляўнічых Даўгінаўскай і Павяцкай пярвічак.
Між тым, усе старыя збудаванні патрабуюць рэканструкцыі ці замены.
Раённая арганізацыйная структура заахвочвала актыўнасць у правядзенні біятэхнічных мерапрыемстваў і ўліковых работ, арганізацыі палявання. За 2013 год выдадзена 16 ільготных пуцёвак на пушнінных звяроў, летась—21 на вадаплаўную дзічыну і 47 на пушнінных звяроў.
За мінулы год ва ўгоддзях таварыства здабыта 69 казуль і 20 ласёў, у тым ліку сваімі паляўнічымі адпаведна 14 і 8, прыезджымі — 15 і 6, замежнымі — 40 і 6.
У таварыстве паляўнічых і рыбаловаў налічвалася 255 жыхароў раёна, пры тым непасрэдна паляўнічых паменела з 227 да 204, калі меркаваць па ўплаце членскіх узносаў.
Сярод першачарговых задач названы павышэнне актыўнасці членаў арганізацыйнай структуры, упор на пярвічныя калектывы паляўнічых і паляпшэнне маральна-псіхалагічнай абстаноўкі.
Дырэктар раённай аргструктуры І.Ч. Атрошка дапоўніў, што гадавы план даходаў выкананы на 121%, паступленні ад паляўнічай дзейнасці перабольшылі заданне на 7%, у тым ліку ад замежнага паляўнічага турызму — на 48%.
У ходзе абмеркавання дакладаў паступалі пытанні па практыцы выдзялення льготных пуцёвак і фарміраванні цаны на дзічыну, выкарыстанні даходаў, падборы егераў, якія павінны быць мясцовымі, выкананні планаў па асобных паказчыках і іншым.
Рэспубліканскі і абласны прадстаўнікі паабяцалі, што дзейнасць раённай арганізацыйнай структуры таварыства, цэны і тэрміны правя-дзення мерапрыемстваў у ім будуць на пастаянным кантролі, усе злабадзённыя пытанні аператыўна вырашацца, прадоўжаць дзейнасць паляўнічыя дачы і калектывы, але для гэтага ў першую чаргу патрэбны намаганні саміх аматараў палявання. Прагучаў заклік да ўдзельнікаў канферэнцыі станавіцца гаспадарамі ў сваёй гаспадарцы.
Праведзены выбары раённага савета РДГА "БТПР" з 11 членаў, узначальваць які даручана намесніку старшыні райвыканкама Л.І. Лясовічу. Сфарміравана праўленне, у склад якога па прапанове дэлегатаў уключаны старшыні пяр-вічных паляўнічых таварыстваў. Выбраны тры прадстаўнікі на абласную канферэнцыю.
Леанід МАТЭЛЕНАК.