Пошліну—па прызначэнні

Пры праверцы аднаго з райвыканкамаў вобласці ўстаноўлена, што не па мэтавым прызначэнні былі выкарыстаны ў 2014 годзе сродкі пошліны ў 11,9 млрд. рублёў. Яны накіраваны на фінансаванне работ па рэканструкцыі двух вуліц, якія не з'яўляюцца працягам дарог з асфальта- і цэментабетонным пакрыццём, чым парушаны патрабаванні закона "Аб рэспубліканскім бюджэце на 2014 год". 

З пазіцыяй Камітэта пагадзілася Міністэрства фінансаў: накіраванне сродкаў пошліны на рамонт вуліц, якія пераходзяць у мясцовыя дарогі і за межамі населенага пункта не маюць асфальта- і цэментабетонных пакрыццяў, не прадугледжана. 

Прынятымі мерамі раённаму бюджэту абмежаваны датацыі на 8,6 млрд. рублёў. Каб папярэдзіць падобныя парушэнні ў іншых рэгіёнах, органам улады прапанавана вызначыць пералік вуліц (з улікам патрабаванняў да пакрыцця дарог), адрамантаваць якія можна за сродкі пошліны.

Справаздачнасць любіць пунктуальнасць 

У ходзе кантрольна-аналітычных мерапрыемстваў устаноўлена, што за ІІІ квартал сёлета кіраўнікі 4 прадпрыемстваў не забяспечылі своечасовае прадастаўленне формы дзяржаўнай статыстычнай справаздачнасці 4-нормы ТЭР аб выніках выкарыстання паліва, цеплавой і электрычнай энергіі. 

Прычынамі таму—невызначэнне кола адказных асоб за выкананне гэтай работы і адсутнасць кантролю за дастаўкай справаздачы нарачным. Для папярэджання падобных правапарушэнняў камітэт дзяржаўнага кантролю нагадвае кіраўнікам прадпрыемстваў пра неабходнасць прадастаўлення дзяржаўнай статыстычнай справаздачнасці ва ўстаноўленыя тэрміны. 

Несвоечасовасць ці ігнараванне патрабаванняў могуць прывесці да штрафавання службовай  ці паўнамоцнай асобы на суму ад 20 да 80 базавых велічынь (цяпер гэта ад 3,6 да 14,4 млн. рублёў).