Планы выконваем
Дзяржаўная лесагаспадарчая ўстанова “Дзісенскі лясгас” займае 101257 гектараў на тэрыторыі Міёрскага, Шаркаўшчынскага і Глыбоцкага раёнаў. У ім 9 лясніцтваў. Лясы першай групы займаюць 49% усіх угоддзяў і прадстаўлены заказнікамі рэспубліканскага і мясцовага значэння, асабліва ахоўваемымі прыроднымі тэрыторыямі, насаджэннямі высокай каштоўнасці і іншымі, дзе гаспадарчая дзейнасць абмежавана альбо поўнасцю забаронена.
Асноўная задача нашых лесаводаў—кантроль за станам, выкарыстаннем, аховай, абаронай дзяржаўнага ляснога фонду, забеспячэнне пастаяннага неабядняючага і рацыянальнага выкарыстання лясоў для задавальнення патрэб эканомікі, а таксама юрыдычных і фізічных асоб у драўніне. Мы ўзнаўляем насаджэнні, своечасова вядзём аднаўленчыя работы на непакрытых лесам участках дзяржлясфонду, паляпшаем пародны склад, павялічваем прадукцыйнасць, узмацняем асяроддзеўтваральныя, водаахоўныя, абаронныя, санітарна-абаронныя, рэкрэацыйныя і іншыя функцыі лясоў.
План 8 месяцаў асноўных лесагаспадарчых мерапрыемстваў выкананы. Высечкі догляду праведзены на 480 га, нарыхтаваны 24 тыс. куб. м драўніны. Санітарныя высечкі ахапілі 264 гектары, ачышчаны ад захламленасці 272 га, у тым ліку ўздоўж аўтадарог, у водаахоўных зонах, вакол населеных пунктаў на 193 га. 353 гектары занялі новыя насаджэнні, з іх 12 га занялі цвёрдалісцёвыя пароды. Догляд культур праведзены на 787 гектарах, закладзена школа для вырошчвання буйнамернага пасадачнага матэрыялу.
Адначасова ахоўваем лес ад парушальнікаў, пажараў, шкоднікаў і хвароб. Абсталявалі 8 новых месц адпачынку, адрамантавалі 42 існуючыя, устанавілі 150 аншлагаў прыродаахоўнай тэматыкі.
Высокімі тэмпамі ідзе асваенне разліковай лесавысечкі па галоўнаму карыстанню, яно ўжо складае 77% агульнай колькасці. Сёлета атрымана прадукцыі на 4601 млн. рублёў пры рэнтабельнасці 18%. Пастаўлена на экспарт 22,4 тыс. куб. м дзелавой драўніны на 856 тыс. долараў ЗША, а гэта 46% таварнай прадукцыі. Прыбытак ад рэалізацыі склаў 814 млн. рублёў.
Сярэднямесячны заробак за 8 месяцаў склаўся на ўзроўні 921 тыс. рублёў. Выкананы план нарыхтоўкі дроў, іх рэалізавана 32,7 тыс. куб. м, у тым ліку 21,2 тысячы—насельніцтву.
Сёлета ўзведзены і здадзены ў эксплуатацыю другі дом паляўнічага, у кастрычніку плануецца ўвод адміністрацыйнага будынка Перабродскага лясніцтва, у 2011-ым—Міёрскага.
Напярэдадні прафесійнага свята выказваем вялікую ўдзячнасць усім працаўнікам лясгаса за самаадданую працу і вернасць абранай прафесіі. Няхай збудуцца вашы планы, рэальнасцю стануць ўсе мары, заўсёды спадарожнічаюць удача і поспех. Моцнага здароўя, асабістага і сямейнага шчасця.
Адміністрацыя лясгаса.
