Якраз на час канікул прыпала правядзенне тыдня дзіцячай і юнацкай кнігі для чытачоў раённай дзіцячай бібліятэкі пад гучнай назвай "Яе вялікасць — кніга". У мерапрыемствах удзельнічалі вучні не толькі гарадскіх школ, але і раёна.
У першы дзень выправіліся ў падарожжа па творах Галіны Уладзіміраўны і Сяргея Анатольевіча Трафімавых, што адносяцца да аўтараў навукова-парулярнага накірунку. Урокі міласэрнасці "Давайце вучыцца дабрыні" чэрпалі са старонак духоўнай літаратуры.
У гасцёўні "Вясенняя раніца" ўдзельнічалі дзеці са школы мастацтваў, чые работы прадстаўлены на выставе ў зале, і выкладчыца Н. Э. Даргель. Аўтары карцін знаёмілі прысутных з тэхнікай выканання, тэмай сваіх твораў.
100-годдзю з дня нараджэння Сяргея Міхалкова прысвячалася сустрэча "У гасцях у дзядзі Сцёпы".
На заканчэнне аб'ядналі два моманты — цікавы і прыемны: сустрэчу з майстрамі мясцовых промыслаў "Спадчыну трэба ратаваць" і ўзнагароджанне лепшых чытачоў — "Мудрасці жыцця вучыцца ў кніг". Дарэчы, гэтае званне атрымалі 32 сябры бібліятэкі. Пра заключнае мерапрыемства чытайце пазней.
Вольга ВІШНЕЎСКАЯ.
