Падчас “прамой лініі” начальнік аддзела загс Ірына Леанідаўна Гушча адказвала на пытанні, якія хвалююць жыхароў раёна. Вось некаторыя з іх.
Ірына Леанідаўна, як атрымаць паўторны дакумент?
— Для гэтага трэба з пашпартам звярнуцца ў аддзел, напісаць пісьмовую заяву, заплаціць дзяржпошліну. Калі жанчына змяніла прозвішча пры заключэнні шлюбу, то ёй неабходна прадаставіць пасведчанне аб яго рэгістрацыі.Штогод наш аддзел па заяве грамадзян выдае да 250-300 паўторных дакументаў, найбольш — пасведчанняў аб нараджэнні.
Калі грамадзяне заключалі шлюб ці рэгістравалі нараджэнне дзіця ў сельвыканкаме, ці можна атрымаць паўторны дакумент у раённым аддзеле?
— Штомесячна сельвыканкамы, а таксама Дзісенскі гарвыканкам, накіроўваюць у раённы загс запісы актаў грамадзянскага стану ў 2-х экзэмплярах, з якіх адзін застаецца ў нас на захоўванні, а другі адсылаецца ў сектар архіва органаў загса галоўнага ўпраўлення юстыцыі Віцебскага аблвыканкама, які размешчаны ў абласным цэнтры па вул. Праўды,18.
А як быць, калі запіс быў зроблены ў іншым раёне?
— У такім выпадку для выбару паўторнага дакумента неабходна накіраваць пісьмовы запыт у аддзел, дзе складзены запіс. Кожны гэта можа зрабіць самастойна. Важна пры звароце дакладна ўказаць усе неабходныя звесткі, у тым ліку прыгадаць калі складзены запіс. Мы пры патрэбе падкажам адрас цікавячага вас загса, патлумачым як аформіць зварот. Тэлефануйце. Калі ж прыедзеце ў раённы аддзел, то зможаце тут запоўніць спецыяльны бланк. У дадатак да заявы будзе прыкладзены суправаджальны ліст і пісьмовая пошта накіруецца па дакладнаму адрасу. Нагадаю, што паўторныя пасведчанні (а таксама даведкі), дасланыя з іншых рэгіёнаў, адрасуюцца не заяўніку, а ў раённы аддзел загса па месцы прапіскі, дзе атрымаць іх можна пры прад’яўленні дакумента пацвярджаючага асобу. Давядзецца таксама заплаціць дзяржпошліну. Карыстаючыся выпадкам хачу нагадаць, што некалькі гадоў назад з пашпартнай службы Міёрскага РАУС (цяпер групы па грамадзянству і міграцыі) у наш аддзел перададзены пасведчанні аб нараджэнні, заключэнні шлюбу і некаторыя іншыя дакументы, якія засталіся там пры атрыманні (афармленні) пашпартоў. Пацікаўцеся ці няма сярод іх і вашых, а калі адшукеце “згубу”, то забярыце яе (плаціць не трэба).
Ці магу я лічыць сябе беларусам, калі нарадзіўся ў Беларусі, а тата мой па нацыянальнасці ўкраінец, мама — руская?
— На жаль, не можаце. Нацыянальнасць грамадзяніна ў нашай краіне вызначаецца па нацыянальнасці яго бацькоў, а не па месцы нараджэння ці пражывання.
Раскажыце, калі ласка, пра тэрміны рэгістрацыі шлюбу і якія патрэбны дакументы пры падачы заявы.
— Грамадзяне, якія жадаюць стварыць сям’ю, павінны прыйсці ў загс з пашпартамі. Пажадана мець і пасведчанні аб нараджэнні, каб падцвердзіць нацыянальнасць. Хто ўступае ў шлюб паўторна, прыносяць дакумент, пацвярджаючы скасаванне папярэдняй рэгістрацыі ці пасведчанне аб смерці, рашэнне суда. Нават калі хтосьці не зможа прадаставіць такія дакументы, то ў прыёме заявы на рэгістрацыю шлюбу не будзе адмоўлена, а патрэбныя “паперы” паспрабуем адшукаць у нашым архіве (калі яны там ёсць) ці накіруем запыт у іншыя органы.
Рэгістрацыя шлюбу адбываецца ва ўзгодненыя з заяўнікам тэрміны, але не раней чым праз 15 дзён і не пазней трох месяцаў пасля падачы заявы.
Самыя насычаныя вясельнымі ўрачыстасцямі летнія месяцы. А таму многія пары яшчэ у пачатку вясны цікавяцца магчымасцю зарэгістраваць шлюб у ліпені, жніўні. Для гэтага ў нас ёсць журнал папярэдняга запісу.
А ці можна “абыйсці” устаноўлены 15-дзённы тэрмін?
— Пры наяўнасці ўважлівых прычын кіраўнікі органаў запісу актаў грамадзянскага стану могуць дазволіць заключэнне шлюбу і ў карацейшыя тэрміны. А пры наяўнасці асаблівых абставін (цяжарнасць, нараджэнне дзіцяці, непасрэдная пагроза для жыцця асобы, якая ўступае ў шлюб…) яго можна зарэгістраваць нават у дзень падачы заявы.
Той, хто не змог задаць пытанне падчас прамой тэлефоннай лініі, можа пазваніць па нумары 4-18-51 у любы іншы дзень, за выключэннем выхадных, і атрымаць адказ.
Ірына ГУШЧА.