— Раней пашпарты выдавалі з 16 гадоў. Ці праўда, што цяпер гэты дакумент атрымліваюць у 14-гадовым узросце? Майму сыну 13 з паловай, напэўна, надышоў час падаваць заяву, куды можна звярнуцца, калі хлопчык зарэгістраваны па месцы жыхарства ў сельскай мясцовасці?
Адпаведна Указа №294 ад 03.06.2008 г. "Аб дакументаванні насельніцтва Рэспублікі Беларусь" пашпарт абавязаны мець кожны грамадзянін, які дасягнуў 14-гадовага ўзросту. Дзеці, якім споўнілася поўных 13 (г.зн.13 гадоў + 1 дзень) дакументуюцца пашпартам грамадзяніна Рэспублікі Беларусь. Прычым, калі на дзень падачы заявы яшчэ не споўнілася 14, пашпарт выдаецца бясплатна. Грамадзяне, зарэгістраваныя ў сельскай мясцовасці, падаюць заяву на выдачу пашпарта ў сельвыканкам па месцы жыхарства, а міярчане — у разлікова-даведачны цэнтр УП ЖКГ.
Не аформіўшы пашпарт дзіцяці ва ўстаноўлены тэрмін, вы пазбаўляеце яго магчымасці працаўладкавацца ў час летніх канікул, прайсці цэнтралізаванае тэсціраванне, паступіць у навучальную ўстанову, атрымаць атэстат аб заканчэнні школы і г.д.
— Тэрмін дзеяння майго пашпарта заканчваецца ў ліпені 2017 года. У сакавіку сёлета я буду ўступаць у шлюб. Калі мне неабходна падаць заяву для абмену пашпарта ў сувязі са зменай прозвішча?
— Гэта неабходна зрабіць у бліжэйшы час пасля заключэння шлюбу, бо пасля аднаго месяца з дня перамены прозвішча пашпарт будзе з'яўляцца несапраўдным. Тэрмін вырабу новага дакумента — месяц, кошт — 90 тысяч рублёў (0,5 б.в.). Можна атрымаць яго ў паскораным парадку—праз 15 дзён з дня падачы заявы з дадатковай аплатай той жа сумы — 90 тысяч рублёў.
— Кажуць, што пашпарт лічыцца сапраўдным яшчэ на працягу месяца пасля заканчэння тэрміну яго дзеяння. Гэта так?
— Няправільнае сцвярджэнне. Пашпарт лічыцца несапраўдным у выпадку заканчэння тэрміну яго дзеяння. Грамадзянін мае права менш чым за год да гэтага звярнуцца для яго абмену. Пражыванне без пашпарта ці па несапраўднаму дакументу пагражае папярэджаннем ці штрафам у памеры да 4-х базавых велічынь.
Алена РАКШНЯ, старшы інспектар групы
па грамадзянстве і міграцыі РАУС.
