28 лістапада ў праваслаўных пачаўся адзін з самых строгіх пастоў, які папярэднічае вялікаму святу Божага Нараджэння. Завершыцца ён на Куццю — 6 студзеня. Каб "ачысціць цела" вернікі ў гэты перыяд адмаўляюцца ад мяса, а ў асобныя дні нават і ад алею, рыбы. Для дзяцей, старых і хворых людзей, цяжарных і кормячых жанчын правілы посту паслабляюцца. Аднак царква сцвярджае, што абмежаванне ў ежы без пакаяння і ўдзелу ў богаслужэннях — гэта не пост, а толькі дыета. Паўсядзённая малітва і наведванне царквы, чытанне Святога Пісання і хрысціянскай рэлігійнай літаратуры спрыяюць ачышчэнню душы. Неабходна ўстрымацца ад забаўляльных мерапрыемстваў, супрацьстаяць шматлікім спакусам і грахоўным памкненням, не рабіць зла, не асуджаць акружаючых, дапамагаць тым, хто мае патрэбу.
Варта ведаць, што па прадпісаных Царквой правілах падчас посту муж і жонка павінны адмовіцца ад інтымных зносін. Устанаўліваюцца абмежаванні і ва ўжыванні алкагольных напояў. Калі хтосьці знаходзіцца ў сварцы або трымае на кагосьці гнеў, то ў перыяд посту неабходна абавязкова памірыцца, бо грахі гонару, асуджэння, нянавісці і злосці пазбаўляюць таго, хто пасціцца, усяго плёну.
Каталіцкая Царква распачала пост 1 снежня, а закончыцца ён 24 снежня. Гэты перыяд католікі называюць Адвэнтам, што перакладаецца з лацінскай мовы як "чаканне". На працягу 4 тыдняў штодзённа ва ўсіх касцёлах перад усходам сонца будуць праходзіць Святыя Імшы, якія называюцца Раратнімі. У касцёле ўстанаўліваецца вялікая свечка, якая сімвалізуе вобраз Найсвяцейшай Панны Марыі — менавіта яе ўшанаванню надаецца ў гэты перыяд асаблівае значэнне. Агонь свечкі параўноўваецца з ранішняй зоркай, што папярэднічае ўзыходу сонца: Божая Маці з'яўляецца тым праменьчыкам, які прадвяшчае нараджэнне Збаўцы. Да таго ж, Дзева Марыя дае нам прыклад душэўнай і цялеснай прыгажосці, чысціні і пакорлівасці, да якіх трэба кожнаму імкнуцца і жыць адпаведна запаветам Божым. Гледзячы на Марыю — Маці Ісуса Хрыста, звяртаючыся да яе з малітвамі, вернікі павінны імкнуцца, асабліва ў час Адвэнту, перамагчы свае слабасці і грахі.
Кожная раратная Імша ў каталіцкім касцёле па даўняй традыцыі праходзіць з удзелам дзяцей, якія трымаюць у руках свечкі, што таксама выклікае шматлікія асацыяцыі. А яшчэ на працягу посту ў касцёле паступова запальваюць чатыры свечкі (штотыднёва па адной). Паступовае ўзмацненне святла з набліжэннем Нараджэнны Хрыстова сведчыць пра выцясненне цемры грахоў Святлом Збаўцы, якое нясе мір, веру, надзею і любоў. Сплеценыя ў вяночкі зялёныя яловыя галінкі сімвалізуюць вечнасць жыцця і бясконцую Божую міласць.
І праваслаўныя, і каталіцкія святары заклікаюць хрысціян у дні чакання свята стварыць належную атмасферу посту не толькі ў сем'ях, але і ў грамадскіх месцах, у працоўных калектывах. А чаму б і не? Дабрыня, спагадлівасць, прыветная ўсмешка, дабрачыннасць — яны павінны быць паўсядзённымі, як хлеб на нашым стале.
На здымках: на Раратнай Імшы ў Міёрскім касцёле.
Эліза БЛАЖЭВІЧ.
Фота Казіміра БЛАЖЭВІЧА.