1 мая ў парафіі Беззаганнага Зачацця Найсвяцейшай Панны Марыі ў Дзісне прайшоў турнір па міні-футболе на кубак ксяндза-біскупа Уладзіслава Бліна сярод міністрантаў Віцебскай дыяцэзіі. У спаборніцтвах прымалі ўдзел каманды з Віцебска, Лучая, Міёр і Дзісны. Дарэчы, з абласнога цэнтра на спаборніцтва хлопцы завіталі ўпершыню, а астатнія сустракаліся ўжо трэці год запар. Падтрымаць ігракоў прыехалі святары Мікалай Ліпскі і Тадэуш Дабравольскі, а таксама дыякан Валерый Марціноўскі. За мясцовых футбалістаў шчыра хварэў ксёндз Аляксандр Грыцкевіч.
Гульні праводзіліся па кругавой сістэме, таму кожная каманда мела магчымасць памерацца сіламі з усімі сапернікамі.
Пасля жараб’ёўкі і агульнага пастраення галоўны суддзя турніру Іван Мечыслававіч Навіцкі напомніў правілы і нагадаў, што, нягледзячы на розныя моманты гульні, трэба памятаць аб павазе і духу братэрства.
У матчах выявіўся даволі высокі ўзровень падрыхтоўкі дзісенскай каманды, якая і заняла першае месца, атрымаўшы галоўную ўзнагароду — кубак. За другое месца змагаліся каманды з Лучая і Міёр. Апошнія ў гэтым годзе ўзмацнілі састаў і сталі сярэбранымі прызёрамі, а лучайскія футбалісты аказаліся на трэцім месцы. Віцябчанам дасталася чацвёртая пазіцыя.
Ігракі і балельшчыкі з добрым настроем ад’язджалі з Дзісны, яшчэ раз упэўніўшыся, што футбол — гэта адзін з найлепшых спосабаў правесці час і выдатная магчымасць паказаць свае спартыўныя здольнасці, а да таго ж праз свае дасягненні парадаваць вернікаў і святароў родных парафій.
Аляксандр ГРЫЦКЕВІЧ,
ксёндз.
