Спартыўныя спаборніцтвы для дзяцей-інвалідаў “Усе разам” прайшлі 23 лістапада ў цэнтры карэкцыйна-развівальнага навучання і рэабілітацыі. Гэта мерапрыемства — добрая традыцыя ва ўстанове і чаканае свята для дзетак.
Удзельнікаў і балельшчыкаў вітала сацыяльны педагог цэнтра Марыя Генрыкаўна Трубач. Яна нагадала пра карысць фізічных практыкаванняў для здароўя і запрасіла дзяцей на зарадку. Невялікая размінка была першай порцыяй пазітыву, пасля якой пачалася конкурсная праграма.
Прапаўзці праз “мышалоўку”, збіць мячыкам кеглі, паказаць сябе ў ролі баскетбалістаў і футбалістаў, сабраць ураджай садавіны з завязанымі вачыма — у гэтых і іншых спаборніцтвах дзеці ўдзельнічалі з задавальненнем. Некаторым так спадабаліся заданні, што хацелася паўтарыць іх яшчэ раз.
У насычанай праграме адводзілася месца для музычнай паўзы. Вясёлы танец падарылі канкурсантам і прысутным выхаванцы дзіцячага садка №3.
Для бацькоў, што прыйшлі падтрымаць сваіх дзетак, таксама былі прадугледжаны экзамены на спрыт і ўмеласць.
За ходам спаборніцтваў сачыла журы, якое вызначала лепшых у розных намінацыях. Кожны ўдзельнік атрымаў медаль, грамату, падарунак і шмат станоўчых эмоцый.
Кацярына СУРАВЕЦ.