Са спортам Саша сябруе з чацвёртага класа. Хуткі і спрытны хлопец ужо ў такім юным узросце вылучаўся добрымі фізічнымі дадзенымі. Развіць іх і скіраваць энергію ў правільнае рэчышча дапамог настаўнік Сяргей Аляксеевіч Сцепулёнак.
Аляксандр Шамшур
Узрост: 14 гадоў.
Школа: Узмёнская ДС-БШ.
Від спорту: лёгкая атлетыка.
Трэнер: С.А. Сцепулёнак.
Праз некаторы час хлопец стаў паказваць добрыя вынікі на спаборніцтвах. На раёне не раз займаў першыя-другія месцы, выязджаў на вобласць. Там, канечне, у лідары не выйшаў, аднак, як зазначае сам Саша, у яго яшчэ ўсё наперадзе. Галоўнае—задацца мэтай.
Прызнаецца, што перад стартам амаль не хвалюецца—тут галоўнае вытрымка. Ад усіх перажыванняў пазбаўляе радасць ад разумення, што сапернікі засталіся ззаду. Сваімі перамогамі Саша хваліцца не любіць, пра поспехі расказвае сціпла і стрымана, адзначаючы, што проста робіць тое, што яму падабаецца.
Вольны час хлопец таксама праводзіць актыўна і з карысцю для здароўя—катаецца на веласіпедзе, гуляе з сябрамі ў футбол. Са спакойных відаў адпачынку аддае перавагу рыбалцы.
"Лічу, што спорт—важная ўмова здаровага ладу жыцця для любога чалавека,—дзеліцца думкамі Аляксандр.—На жаль, такіх аматараў малавата, менавіта таму вялікую ўвагу трэба надаваць фізічнаму выхаванню".
Арына БАРКОЎСКАЯ.
Фота Казіміра БЛАЖЭВІЧА.