У вялікім свеце захапленняў дзеці аддаюць перавагу тым заняткам, якія ім найбольш падабаюцца, і з’яўляецца жаданне працаваць, ствараць штосьці арыгінальнае. Важна дапамагчы хлопчыкам і дзяўчынкам раскрыць таленты і здольнасці, далучыць іх да цікавых спраў, з’яднаць агульнымі інтарэсамі. У гэтым напрамку і працуюць з дзецьмі спецыялісты Дзісенскага філіяла Міёрскага раённага Цэнтра дзяцей і моладзі. А яшчэ педагогі імкнуцца навучыць маладое пакаленне берагчы гістарычную спадчыну і культурныя традыцыі, быць патрыётамі, любіць Радзіму, аддаваць перавагу не матэрыяльным каштоўнасцям, а духоўным. На працягу ўсяго года ў гэтай установе кіпіць работа: праводзяцца розныя мерапрыемствы, конкурсы, праграмы, акцыі, дзейнічаюць гурткі.
Сумеснымі намаганнямі настаўнікаў, школьнікаў і іх бацькоў, спонсараў адкрыўся абноўлены краязнаўчы музей гісторыі г. Дзісна, які ўжо наведалі звыш 250 чалавек. Праведзены 52 экскурсіі. На стэндах і стэлажах шмат цікавых рэчаў, фрагментаў, дакументаў. Тут ёсць нават знаходкі каменнага веку. Можна “зазірнуць” і ў 15-16 стагоддзі.
Рыхтуем экспанаты для адкрыцця ў Дзісне экалагічнага музея, які, мяркуем, сёлета прыме першых наведвальнікаў.
Пры філіяле Цэнтра дзяцей і моладзі дзейнічаюць шматлікія гурткі мастацкай творчасці. У тым ліку “Вакал”, “Вясёлыя ноткі”, “Гітара”, дзе можна атрымаць і развіць вакальныя і музычныя навыкі, а ў “Тэатры школьніка” — сцэнічнае майстэрства. Вучыць хлопчыкаў і дзяўчынак вакалу настаўнік Аляксей Антонавіч Астукевіч, якому ўдаецца падрыхтаваць дзяцей не толькі да мясцовых канцэртных выступленняў, але і да раённых. Напрыклад, летась Джэсіка Двойніна на раённым этапе рэспубліканскага конкурсу “Здравствуй, мир!” у намінацыі “Вакальны спеў” заняла першае месца, а Алеся Лушчык — другое. А з ліку юных тэатралаў удала выступіла Света Баброўская: у намінацыі “Тэатральная творчасць” ёй прысуджана трэцяе месца.
Многае зроблена рукамі дзяцей на занятках у гуртках “Бісерапляценне”, “Чароўны куфэрак”, “Умелыя рукі”, “Вышыванне і абрэзкавае шыццё”. Калектыўныя і індывідуальныя работы юных майстроў дэманструюцца на выставе ў Цэнтры, а лепшыя — на значымых мясцовых святочных мерапрыемствах, на раённых і абласных конкурсах і выставах-кірмашах.
У гэтым навучальным годзе распачалі дзейнасць новыя аб’яднанні па інтарэсах — “Майстры цацак”, “Народная цацка”, “Дэкаратыўная цацка і стыль”, “Абрэзкавае шыццё”, “Разьба па дрэве”.
Педагогі Цэнтра рады сустрэчам з дзецьмі ў суботнія дні, калі праводзяцца гульнявыя праграмы, конкурсы і святы, нярэдка з удзелам дарослых. Пасля такіх мерапрыемстваў заўсёды чуем словы падзякі ад прысутных за падараваныя ім хвіліны добрага настрою. Традыцыйным стала святкаванне Дня маці, 8 Сакавіка, Дня Перамогі і вызвалення нашай рэспублікі ад нямецка-фашысцкіх захопнікаў, Дня абароны дзяцей, акцый “Мы розныя, але разам” (прымеркавана да Дня інвалідаў), “Дапаможам пярнатаму сябру”, “Жыву ў Беларусі і тым ганаруся”.
Шмат добрых спраў на рахунку клуба “Міласэрнасць”, які працуе з непаўналетнімі інвалідамі, падапечнымі сацыяльнага прытулку, пажылымі людзьмі. У рамках работы гэтага фарміравання аказана адрасная дапамога ветэранам педагагічнай працы, праведзена аперацыя “Твары дабро на ўсёй зямлі” (віншаванні да святаў), акцыя “Шырэй круг сяброў” (правядзенне канцэртаў і спектакляў для ветэранаў і людзей сталага ўзросту).
Наведвальнікі Цэнтра дзяцей і моладзі, а таксама хлопчыкі і дзяўчынкі з сацыяльнага прытулку і карэкцыйнага цэнтра збіраюцца штогод разам напярэдадні Новага года. У гэтым свяце прымаюць удзел прадстаўнікі ГА БРСМ. Застанецца ў памяці сустрэча 2013-ага. Для юных гледачоў быў пастаўлены цікавы казачны спектакль, які затым змяніўся дыскатэкай ля ўпрыгожанай елкі, што ў якасці навагодняга падарунка прадаставіў Дзісенскі лясгас.
У студзені праводзіцца акцыя “Дом без адзіноты”. З праграмай “Нараджэнне Хрыстова” дзеці выступілі перад пажылымі людзьмі.
У Дзісенскім філіяле Цэнтра дзяцей і моладзі працуюць вопытныя, уважлівыя і ўлюбёныя ў сваю работу педагогі — Вольга Аляксандраўна Смаршчок, Аляксей Антонавіч Астукевіч, Вольга Вадзімаўна Сіцько, Таццяна Анатольеўна Кісель, Уладзімір Дзмітрыевіч Расянец. Яны адкрываюць юным асобам свет цудоўнага і прыгожага, дапамагаюць узняцца па прыступках творчага майстэрства, фарміруюць у іх актыўныя жыццёвыя пазіцыі.
На здымках: педагог дадатковай адукацыі В. В. Сіцько вядзе заняткі ў гуртку “Умелыя рукі”; Алеся Лушчык на занятках у гуртку “Чароўны куфэрак”.
В. СМАРШЧОК,
дырэктар філіяла ДУДА
“Міёрскі раённы Цэнтр
дзяцей і моладзі”.