Перакананы, што нават самыя маленькія чытачы пачынаюць знаёмства з сучаснай беларускай літаратурай у тым ліку па творах Уладзіміра Ягоўдзіка. У далёкім 1988 годзе выйшла яго першая кніга "Сонейка, свяці", а потым выданні пасыпаліся адно за другім нібы з рога дастатку: "Янка і Ружа", "Дзівосны карабель", "Свята летаўца", "Бабуліна варта", "Сем цудаў Беларусі", "Рэха турынага рога"… Набралася на цэлую выставу на стэндзе раённай дзіцячай бібліятэкі. Менавіта ля яго і размясціўся аўтар 21 мая ў час сустрэчы з маленькімі чытачамі — вучнямі 3-4 класаў школ райцэнтра.
Адразу стала зразумела, што пісьменнік не толькі ўмее пісаць для маленькіх чытачоў, у яго талент з імі размаўляць. Сустрэча пачалася з захапляльных гісторый. Потым да іх дадаліся пытанні як па-беларуску вітацца, адкуль пайшла назва Міёры, якая ў нас самая цудоўная мясціна. На іх актыўна адгукнулася аўдыторыя. Дзеці дружна пачалі шукаць адказы, адна дзяўчынка-удзельніца сустрэчы нават прадэкламавала беларускі верш.
Кожная дзіцячая ініцыятыва заахвочвалася падарункамі — маляўнічымі дзіцячымі выданнямі з " чароўнай торбы". Вось гэтую "торбу" са сваёй кнігай Уладзімір Яўгодзік пакінуў у якасці прыза для пераможцы конкурсу "Лета з беларускай кнігай". Гэтая акцыя заклікана выявіць самага актыўнага чытача выданняў беларускіх аўтараў у час летніх канікулаў у раённай дзіцячай бібліятэцы.
Дзеці, чытайце беларускае. А таксама накіроўвайце свае "чароўныя" малюнкі ў часопіс "Качели".
Між тым, сустрэча працягвалася відэафільмамі, конкурсамі для вучняў і іх настаўнікаў, гульнямі, вельмі "страшнымі" казкамі і шматлікімі захапляльнымі пытаннямі. Напрыклад, нават не кожны дарослы адразу адкажа, хто нараджаецца двойчы. А дзеці з гэтым спраўляліся хутка.
У заключэнне зазначу, што пісьменнік Уладзімір Ягоўдзік, адзначаны рознымі літаратурнымі прэміямі, не першы раз наведвае з цікавымі дзіцячымі мерапрыемствамі нашы Міёры. І ў гэты дзень яго маршрут ужо прайшоў праз Глыбокае і Браслаў.
Леанід МАТЭЛЕНАК.
Фота аўтара.