> Здароўе > Першая дапамога? Лёгка!
Першая дапамога? Лёгка!27-05-2011, 11:05. : gazeta |
У рамках тыдня здароўя ў раёне праводзіўся шэраг мерапрыемстваў. Накіраваныя яны былі на выхаванне ў школьнікаў любові да здаровага ладу жыцця і адмоўнага стаўлення да шкодных звычак. У спартшколе прайшоў матч па міні-футболу, а ў агульнаадукацыйных — урокі забаўляльна-пазнавальнага характару і сустрэчы-гутаркі са спецыялістамі: медыкамі, міліцыяй і святарамі. У прыватнасці, практычна кожны дзень СШ №2 быў адзнаменаваны нейкай невялікай падзеяй. Распачала тыдзень віктарына па здароваму ладу жыцця сярод усіх класаў, праводзіла яе псіхолаг Валянціна Францаўна Слізень. Асабліва спадабаліся вучням практычныя навыкі, якія засвойвалі з інструктарам-валеёлагам Ганнай Віктараўнай Лісковай. Спачатку спецыяліст паказвала, як трэба правільна бінтаваць і пры якіх траўмах, калі рану апрацоўваць зялёнкай, а калі ёдам, і таксама як правільна гэта рабіць, каб не нанесці шкоду. Уважліва выслухаўшы Ганну Віктараўну, і пад яе пільным наглядам вучні 3-4 класаў практыкавалі атрыманыя навыкі на сябрах. Асабліва весяліла іх апрацоўка зялёнкай “фальшыва намаляванай” ранкі. Вось так цікава праходзіў урок для вучняў пачатковых класаў па засвойванні ведаў аказання сабе і іншаму першай медыцынскай дапамогі. Урок закончыўся, застанецца толькі не разгубіцца пры складаных абставінах. У фае на першым паверсе была арганізавана спецыяльная выстава “Здаровы лад жыцця”. Тэма аказалася дастаткова шырокай у праяўленні дзіцячай фантазіі. Удзельнікі-класы атрымалі падзякі, а кожны юны мастак — памятку, як трэба ўмацоўваць здароўе. У СШ №3 праходзіла сустрэча са спецыялістамі раёна: медыкамі, трэнерамі фізкультурна-аздараўленчага комплексу і некаторымі іншымі. Тыдзень здароўя — важны і карысны час мерапрыемстваў для вучняў школы, для якіх актыўнасць фізічная павінна з’яўляцца разгрузкай і частковым адпачынкам ад разумовай дзейнасці. Падрыхтавала Вольга ВІШНЕЎСКАЯ. |