З пачатку года на Міёршчыне за-гінула трое непаўналетніх. Не вярнуўся з навагодняй дыскатэкі 17-гадовы юнак, толькі ў маі яго цела знайшлі ў возеры. У сакавіку ў полымі пажару загінула жанчына разам са сваім маленькім сыночкам. Зусім нядаўна жыхароў раёна ўскалыхнула звестка пра трагічную гібель хлопчыка пад коламі трактара.
Такія страшныя здарэнні заўсёды выклікаюць шок у грамадстве, і ніяк не ўкладваецца ў галаве думка, што гэта магчыма. Але, на жаль, няшчасныя выпадкі здараюцца. Адразу ўзнікае пытанне — хто вінаваты? І са спазненнем прыходзіць думка: “А гэтага магло б і не быць…”
Як папярэдзіць трагедыю? Вядома, бацькі не могуць увесь час кантраляваць сваіх дзяцей. А вось навучыць малых правілам бяспекі — гэта іх абавязак. У арт. 17 Закона РБ “Аб правах дзіцяці”, а таксама ў арт. 75 Кодэкса РБ аб шлюбе і сям’і ўказана, што бацькі павінны ствараць неабходныя ўмовы для выхавання і развіцця дзяцей і рыхтаваць іх да самастойнага жыцця ў грамадстве. Ці трэба казаць, што ў першую чаргу дарослыя самі павінны быць добрым прыкладам для малых.
Часцей нагадвайце дзецям правілы асабістай бяспекі, прывучайце іх быць уважлівымі і асцярожнымі. Не шкадуйце на гэта часу, ён не будзе дарэмна затрачаны.
С. РАМАНОЎСКАЯ,
намеснік пракурора.