Ва ўрочышчы Навалака на беразе возера Важа з 4 па 6 чэрвеня ў чарговы раз прайшоў турыстычны злёт моладзі прадпрыемстваў і арганізацый раёна. На гэты раз на паласу выпрабаванняў выйшла дзевяць калектываў, у ліку іх былі і заўзятыя турысты, якія кожны год дэманструюць сваё майстэрства, і навічкі. Для ўдзелу ў мерапрыемстве сваіх прадстаўнікоў накіравалі ПМК-55, цэнтральная раённая бальніца, Міёрскае ПМС, ДРБУ-203, Дзісенскі лясгас, райпа, раённы аддзел культуры, ВУПКУ “Міёрскі”, СВК “Пад’ельцы”. Адметна тое, што з кожным годам павышаецца ўзровень спартыўнай падрыхтоўкі моладзі, паляпшаецца турыстычная экіпіроўка.
У першы дзень, 4 чэрвеня, у поўдзень, калі ўжо былі разбіты турыстычныя лагеры, ва ўмелым абсталяванні якіх кожная каманда праявіла сваё майстэрства, а таму не было падабенства, прайшло ўрачыстае пастраенне. Права ўзняць сцяг на флагштоку было прадастаўлена камандзе ЦРБ, якая ў мінулым годзе па выніках турыстычных спаборніцтваў заняла першае месца. Адкрыў мерапрыемства галоўны суддзя, начальнік аддзела фізічнай культуры, спорту і турызму Аляксандр Жук.
У трыатлоне першае месца заняла каманда лясгаса, другое—райпа, трэцяе—СВК “Пад’ельцы”. У гэты ж дзень пачаліся гульні па міні-футболу і валейболу.
Не было часу расслабляцца і 5 чэрвеня—адно за другім праходзілі спаборніцтвы. Зноў шанцавала камандзе лясной гаспадаркі. Яна—лідэр па велатурызму, на другую прыступку п’едэстала ўзняліся спартсмены ПМК-55, на трэцюю—ЦРБ. Першынствавалі лясгасаўцы і па велатрыалу. Добрыя вынікі паказалі таксама турысты СВК “Пад’ельцы” і ПМК-55 , якія выйшлі, а дакладней кажучы, “выехалі” на веласіпедах на 2-е і 3-е месцы. На паласе перашкод, дзе трэба было дэманстраваць навыкі па ўстаноўцы палаткі, прапаўзці праз “мышалоўку”, распаліць вогнішча, утрымаць раўнавагу ў час бегу па бервяну, спрытнейшымі і хутчэйшымі былі турысты з ПМК-55 (1-е месца), ПМС(2-е) і райпо (3-е).
Працягваліся спаборніцтвы па міні-футболу і валейболу. Футбалісты ПМК-55 занялі лідзіруючую пазіцыю. Каманда ДРБУ-203—на другім месцы, а ВУПКУ “Міёрскі”—на трэцім. Сярод валейбалістаў удала стартавалі і выйшлі пераможцамі спартсмены лясгаса. Работнікі дарожна-рамонтнай арганізацыі ў гэтым відзе спорту занялі другую пазіцыю, а раённай бальніцы—трэцюю.
Пакуль адны спартсмены праяўлялі сябе ў шматлікіх выпрабаваннях на спартыўных пляцоўках, займаючы прызавыя месцы, другія дэманстравалі строгім суддзям уменне абсталяваць умовы для пражывання ў палатачных лагерах, не парушаючы правілаў пажарнай бяспекі, не прычыняючы шкоды прыродзе. У конкурсе быту перамогу атрымалі каманды ПМК-55 (1-е месца), ПМС (2-е), лясгаса (3-е). Сапернічалі турысты і ва ўменні прыгатаваць смачны турабед. Лепшыя “кашавары” аказаліся ў ПМК-55, лясгасе і ЦРБ. Па выніках конкурсу тургазет “Будні злёту” лепшымі прызнаны выданні туржурналістаў з ЦРБ, ПМС і ВУПКУ “Міёрскі”. Удала падрыхтавалася да конкурсу мастацкай самадзейнасці моладзь сельгаспрадпрыемства “Міёрскі”, ЦРБ, лясгаса, якія пасля выступлення і ўвайшлі ў тройку лепшых. Песнямі ля вогнішча, жартамі, танцамі завяршыўся другі дзень турзлёту.
У нядзелю, 6 чэрвеня, журы падвяло вынікі турзлёту. Першае месца прысуджана камандзе лясгаса, другое—ПМК-55, трэцяе—ПМС. Пераможцам уручаны ўзнагароды, прызы.
А. ЖУК,
галоўны суддзя турзлёту.